Në një postim emocional në Facebook, Bekim Hamza Jashari ngre pyetje të forta për gjendjen e vendit dhe reflektimin tonë si komb. Ai thekson se, 25 vite pas çlirimit të Kosovës dhe 17 vite pas shpalljes së pavarësisë, ende përballen me situata që sfidojnë unitetin dhe dinjitetin e shqiptarëve.
“Dëgjoj lloj-lloj deklarimesh, lajme e akuza,” shkruan ai, duke kritikuar mënyrën se si disa e quajnë aksionet e policisë dhunë apo i krahasojnë me fashizmin. Ai vë në dukje shqetësimin për institucionet paralele dhe mungesën e veprimit të prerë për të luftuar ndikimin e mbetjeve serbe në Kosovë.
Me tone të hidhura, Jashari citon Gjergj Fishtën:
“Ma kollaj asht me mbushun një thes me pleshta sesa me i ba bashk dy shqiptarë,” duke reflektuar frustrimin e tij për mungesën e unitetit kombëtar.
Në përfundim të postimit, ai shpreh respekt dhe mirënjohje për Policinë e Kosovës, duke nderuar gjithashtu dëshmorët e UÇK-së që sakrifikuan për lirinë e vendit.
“Lavdi dëshmorëve të UÇK-së 🇦🇱,” përfundon postimi i tij, një thirrje për ndërgjegjësim dhe veprim për të mbrojtur të ardhmen e Kosovës./Raporto24/
