Njësiti elit i Policisë së Kosovës FIT, ka protestuar para qeverisë së Kosovës, duke shprehur pakënaqësitë e tyre lidhur me shumën e caktuar të rrezikshmërisë, shkruan Raporto24.
Reagime pro e kundër tyre ishin të shpejta.
Liderët opozitar reaguan nxitimthi në mbështetje të këtij njësiti elit, e që dukej se sikur kishin harruar atë që ua rikujtoi sërish ky Njësit se kërkesat e tyre janë qe dhjetë vite, pra në kohën kur këta opozitarë të tanishëm ishin në krye të pushtetit.
Megjithatë, reagimet e atyre që duhej të reagonin, por natyrisht në mënyra tjera, ishin shumë të vonshme, madje të njëjtit e panë të udhës që një “kundërpërgjigje” ndaj kërkesave të kësaj Njësie Elite të kthehet me anë të rrjeteve sociale.
Ishte i pari, kreu i Ministrisë së Punëve të Brendshme, Xhelal Sfeçla, i cili në një reagim të tij në facebook, para së gjithash e mbi të gjitha, tha: “Të ardhurat mesatare mujore gjatë këtij viti të zyrtarëve që protestuan sot janë mbi 2.200 euro”.
Për ta mbështetur këtë, nuk vonoi shumë edhe kreu i Qeverisë reagoi, po kështu në mënyrën e njëjtë sikur edhe ministri i tij.
Albin Kurti, në një postim në facebook, ndër tjera ka shkruar: “Të ardhurat mesatare të shumicës dërrmuese të pjesëtarëve të kësaj njësie elitare sivjet shkuan mbi 2.200 euro në muaj (paga bazë plus shtesat). Tash do ta kenë edhe shtesën e rrezikshmërisë prej 150 euro në muaj, përderisa vazhdon kjo situatë në veri të vendit, e që është niveli më i lartë i kësaj shtese. Në fund të muajit nëntor i bie që përveç pagës së rritur, secili prej tyre do të marrë edhe shumën neto prej 1.350 euro retroaktivisht (shtesa e rrezikshmërisë shkurt-nëntor 2023)”, ka shkruar Kurti.
Mirëpo, në një dokument të siguruar nga Raporto24, dëshmon se paga bazë e një polici të Njësitit Elit (FIT) është 631 euro.
Një polic i këtij njësiti në kushte anonimiteti ka bërë të ditur se për të arritur shumën prej 2100 euro në muaj, përveç pagës bazë ai ka punuar edhe 500 orë shtesë, e që nëse kthehet në ditë pune i bie 20 ditë dhe netë brenda muajit./Raporto24/
