Një shtetas egjiptian është arrestuar nga policia në Durrës, pasi akuzohet se krijoi në Itali, një organizatë kriminale për trafikim të qenieve njerëzore.
49-vjeçari ishte shpallur në kërkim nga autoritetet italiane, ndërsa ligji në vendin fqinj për këtë veprimtari kriminale parashikon si dënim maksimal 20 vjet burgim.
Si rezultat i koordinimit të informacioneve dhe veprimeve policore, me homologët italianë, nëpërmjet specialistëve të Interpol Tiranës, Drejtoria e Forcës së Posaçme Operacionale, në kuadër të operacionit “Operacionalja 36”, kapi në Durrës dhe vuri në pranga shtetasin e shpallur në kërkim ndërkombëtar, për llogari të Italisë, Ë. E., 49 vjeç, të lindur në Egjipt. Gjykata e Katanias, Itali, ka lëshuar urdhër arresti për këtë shtetas, për veprën penale “Trafikimi i qenieve njerëzore”, kryer në kuadrin e organizatës kriminale”, njofton policia.
Ndërkohë, Interpol Tirana vijon bashkëpunimin me Interpol Romën, për të finalizuar procedurën për ekstradimin e 49-vjeçarit, në Itali. /Telegrafi/
