Sot, më 18 qershor 2025, rreth orës 11:00, në oborrin e Gjykatës Themelore – Dega në Suharekë, ka ndodhur një incident fizik ndërmjet palëve të përfshira në një çështje gjyqësore.
Sipas njoftimit zyrtar nga Gjykata Themelore në Prizren, incidenti ndodhi pak para hyrjes në objektin e gjykatës, në momentin kur palët po hynin për seancën gjyqësore të caktuar.
Personi H.K., i cili është pala e dëmtuar në këtë rast penal, ka nxjerrë një mjet të fortë nga çanta dhe ka sulmuar të akuzuarin B.B., ndaj të cilit po zhvillohet një proces gjyqësor për veprën penale “lëndim i lehtë trupor”, e ndodhur më 28 dhjetor 2024.
Reagimi i shpejtë i sigurimit fizik të Gjykatës, që ndodhej brenda objektit, ka parandaluar përshkallëzimin e mëtejshëm të situatës. Menjëherë është lajmëruar Policia e Kosovës, e cila ka ndërhyrë dhe ka nisur procedurat hetimore. Personit që ka pësuar lëndime i është ofruar ndihma e parë mjekësore në vendngjarje, deri në ardhjen e ekipeve të emergjencës.
Gjykata Themelore – Dega në Suharekë, përmes gjyqtarit mbikëqyrës, ka shprehur gatishmërinë për bashkëpunim të plotë me Policinë e Kosovës në funksion të zbardhjes së plotë të rastit.
