Një incident me armë zjarri ka ndodhur mbrëmjen e së enjtes rreth orës 19:30 në rrugën “Isa Kastrati” në Prishtinë, duke shkaktuar shqetësim te banorët e lagjes.
Sipas raportit zyrtar të Policisë së Kosovës, njësitet policore kanë dalë menjëherë në vendin e ngjarjes pas pranimit të informatave për të shtëna armësh. Në vendin e ngjarjes, policia ka gjetur dhe konfiskuar gjithsej tetë gëzhoja, të cilat dyshohet se janë shkrepur gjatë një shkëmbimi zjarri mes një veture dhe një motoçiklete.
Të dyja mjetet janë larguar nga vendi i ngjarjes në drejtim të panjohur, ndërsa fatmirësisht nuk raportohet për persona të lënduar.
Rasti është duke u hetuar nga njësitet përkatëse policore, ndërkohë që për të është njoftuar edhe prokurori kompetent./Raporto24/
