Pas një sezoni zhgënjyes 2024/25, në të cilin Manchester City nuk arriti të fitojë asnjë trofe për herë të parë që nga viti 2017, klubi po përgatitet për një verë të thellë ndryshimesh.
Eliminimi i hershëm nga Kupa e Botës për Klube ka shërbyer si katalizator për riorganizimin e skuadrës nga Pep Guardiola, i cili synon të rifreskojë ekipin dhe të shmangë mbingarkesën në dhomën e zhveshjes.
Sipas raportimeve nga Flashscore, City tashmë ka realizuar katër nënshkrime të reja këtë verë dhe po punon për të sjellë emra të tjerë deri në fund të merkatos. Megjithatë, për të bërë vend për afrimet e reja dhe për të ruajtur ekuilibrin në grup, drejtuesit sportivë kanë identifikuar gjashtë lojtarë që mund të largohen gjatë kësaj vere.
Lista përfshin emra të rëndësishëm si Jack Grealish, John Stones, Ilkay Gundogan, Kalvin Phillips, Kyle Walker dhe James McAtee. Grealish shihet si lojtari më afër largimit, pasi humbi vendin e titullarit në sezonin e kaluar ndaj brazilianit Savinho dhe ka ngjallur interes të madh në tregun ndërkombëtar.
John Stones po tërheq vëmendjen e ish-klubit të tij, Everton, ndërsa edhe Brighton raportohet se është i interesuar për shërbimet e mbrojtësit anglez. Bisedimet mes lojtarit dhe klubit pritet të fillojnë së shpejti për të përcaktuar të ardhmen e tij. Ndërkohë, Ilkay Gundogan, në vitet e fundit të karrierës, po shqyrton oferta nga Arabia Saudite, Turqia dhe Katari, ndërsa City po konsideron edhe një rol drejtues për të në klub pas pensionimit.
Kalvin Phillips, që prej vitit 2024 nuk është më pjesë aktive e Cityt, ka luajtur në huazim dhe pritet të largohet përfundimisht këtë verë. Kyle Walker, i cili gjithashtu e ka shprehur dëshirën për të përfunduar karrierën jashtë Anglisë, sapo ka mbyllur një periudhë huazimi me AC Milan. Sa i përket James McAtee, talenti i akademisë ka kërkuar më shumë hapësirë dhe minutazh, dhe largimi i tij po shihet si mënyra më e mirë për zhvillimin e mëtejshëm.
Me ndryshime kaq të thella në horizont, duket se Manchester City po ndërton një skuadër të re për një cikël të ri, ndërsa Pep Guardiola synon të rikthehet në krye të futbollit anglez dhe evropian. Vera e 2025-ës pritet të jetë një nga më të ngarkuarat për “qytetarët” në vitet e fundit. /Telegrafi/
