Deputetët e Kuvendit të Kosovës do të mblidhen sërish sot nga ora 11:00 për të 42-tën herë me radhë në përpjekje për ta konstituuar legjislaturën e nëntë të dalë nga zgjedhjet e 9 shkurtit.
Edhe pas aktgjykimit që nxori Gjykata Kushtetuese, në Kuvend sërish vazhdoi skenari i njëjtë meqë partitë politike po e lexojnë ndryshe aktgjykimin.
Lëvizja Vetëvendosje po insiston se votimi i fshehtë – përmes të cilit synon që kandidatja e tyre për kryeparlamentare, Albulena Haxhiu, e cila dështoi të merrte votat e nevojshme në votim të hapur – nuk është antikushtetues.
Për partitë tjera kjo s’është e pranueshme meqë thonë se aktgjykimi i fundit i Kushtetueses e bën të qartë se kryeparlamentari duhet të zgjidhet sipas praktikave të deritanishme parlamentare – me votim të hapur.
Për këtë çështje dje është deklaruar edhe presidentja e vendit, Vjosa Osmani, e cila tha se pajtohet me ekipin e saj ligjor se votimi i fshehtë lejohet, por se për këtë duhet të ketë konsensus nga deputetët.
“Konstatimi i ekipit tim ligjor me të cilin unë pajtohem është që nëse lexohet në tërësi aktgjykimi votimi i fshehtë nuk përjashtohet si mundësi, megjithatë për të kërkohet konsensusi i deputetëve. Kjo nënkupton që duhet të ketë votë, duhet të ketë vendim të seancës, para se të shkohet te një mënyrë e tillë”, tha ajo, e cila shtoi se “duhet të pyeten” deputetët.
Ditët e fundit, Osmani thirri edhe takime të ndara me liderë të partive politike në përpjekje për të dalë nga kriza institucionale, megjithatë ato s’dhanë rezultat.
Ndërkohë, PDK dhe LDK për bllokadën e re në Kuvend kanë dërguar edhe dy kërkesa në Gjykatën Kushtetuese. Të dyja po kërkojnë që të shpallen antikushtetuese veprimet e Avni Deharit dhe të konstituohet Kuvendi sipas rendit të ditës.
LDK-ja iu drejtua dje Kushtetueses për sqarim dhe tha se beson se vazhdimet e fundit të seancës konstituive janë bërë “në kundërshtim të plotë” me Kushtetutën e Kosovës dhe me konstatimet e aktgjykimit të Gjykatës Kushtetuese nga 26 qershori.
Një ditë më parë, pas dështimit të 41-të, PDK i ka kërkuar Gjykatës Kushtetuese t’i vlerësojë “shkeljet” në seancën konstituive.
Të dyja këto parti e akuzojnë Deharin për ndryshim arbitrar të rendit të ditës me instruksione të partisë së tij, Lëvizjes Vetëvendosje./Raporto24/
