Kryetari i Federatës së Futbollit të Kosovës, Agim Ademi, ka ndarë një moment të veçantë nga vizita e tij në Zvicër. Ai është takuar në Bazel me yllin e ri të futbollit kosovar, Leon Avdullahu, i cili këtë sezon shkëlqeu me FC Basel, duke fituar titullin kampion.
Përmes një postimi në Facebook, Ademi e ka uruar Avdullahun për suksesin e arritur dhe për transferimin e tij të fundit në klubin gjerman, TSG Hoffenheim.
“Një kafe në Bazel me yllin e futbollit, Leon Avdullahu. E urova për titullin e fituar me FC Basel dhe transferimin në TSG Hoffenheim”, ka shkruar Ademi.
Ky takim vjen në kohën kur gjithnjë e më shumë futbollistë kosovarë po bëjnë emër në arenën ndërkombëtare, dhe FFK vazhdon të ndjekë nga afër zhvillimin e talenteve të saj në diasporë./Raporo24/
