Avokati Arianit Koci ka deklaruar se flamuri i Kosovës ka qenë i pranishëm gjatë gjithë pjesës zyrtare të punimeve në Beograd.
Sipas Kocit, i cili ka komunikuar me Agim Ademin, kryetarin e Federatës së Futbollit të Kosovës, flamuri i Republikës së Kosovës ka qëndruar përkrah flamujve të të gjitha shteteve anëtare të UEFA-s gjatë takimit zyrtar. Ai është hequr vetëm pas përfundimit të mbledhjes, kur gjithçka kishte marrë fund.
Koci e ka cilësuar këtë situatë si një farsë të sajuar nga Serbia për konsum të brendshëm politik, duke theksuar se përpjekjet për ta paraqitur pjesëmarrjen e Kosovës si të parëndësishme ose të diskutueshme janë mashtrime politike dhe jo realitet sportiv.
“Kosova është anëtare e barabartë e UEFA-s dhe FIFA-s, me të gjitha të drejtat dhe simbolet shtetërore. Faktet nuk i ndal askush. Flamuri ynë ka qenë aty – me dinjitet dhe në mënyrë të ligjshme,” ka theksuar Koci./Raporto24
