Hetuesit e Inspektoratit Policor të Kosovës (IPK) kanë arrestuar dy zyrtarë policorë, pas dyshimeve se ata kanë keqpërdorur detyrën zyrtare, raporton Gazeta Sinjali.
Sipas IPK-së, arrestimi i dy policëve ka ndodhur pas një denoncimi të bërë nga një qytetar.
Ky i fundit ka pretenduar se zyrtarët nga Njësia Rajonale e Trafikut Rrugor të Drejtorisë Rajonale të Policisë në Pejë e kishin ndaluar në një pikë kontrolli dhe, për të shmangur shqiptuarjen e gjobës, i kishin kërkuar një shumë monetare.
Pas marrjes së informacioneve dhe kryerjes së hetimeve paraprake, hetuesit e IPK-së kanë arrestuar dy zyrtarët, të cilët dyshohet se kanë kryer veprën penale “Marrja e ryshfetit”. Të dy ata janë dërguar në mbajtje, pasi ndaj tyre është caktuar masa e ndalimit për 48 orë me vendim të prokurorit.
Për të parandaluar çdo ndikim të mundshëm në rrjedhën e hetimit si dhe për të mbrojtur integritetin e procedurës hetimore, IPK i ka rekomanduar Policisë së Kosovës edhe suspendimin e tyre.
