6 maj, 2025 – Ndeshja hapëse e javës së 33-të në Albi Mall Superligën e Kosovës ndërmjet Gjilanit dhe Malishevës është mbyllur pa fitues dhe pa gola, me rezultat 0:0. Takimi u zhvillua të martën pasdite në stadiumin me bari sintetik në Gjilan.
Përkundër përpjekjeve të të dy skuadrave për të arritur fitoren, munguan golat, ndërsa loja u karakterizua me angazhim të lartë nga të dyja palët.
Megjithatë, rezultati i kësaj ndeshjeje mbeti në hije, pasi në minutat e fundit futbollisti i Gjilanit, Oltion Bilalli, pësoi lëndim pas një përplasjeje me portierin e Malishevës. Lojtarit iu ofrua ndihma e parë në fushë për disa minuta, para se të largohej me autoambulancë për trajtim të mëtutjeshëm.
Pas ndërprerjes prej rreth 15 minutash, ndeshja u vazhdua dhe përfundoi pa ndryshime në rezultat.
Pas këtij barazimi, Malisheva mbetet në pozitën e tretë me 49 pikë, ndërsa Gjilani mban vendin e pestë me 46 pikë.
