Barcelona po e përcjell me kujdes procesin e rikuperimit të mesfushorit Frenkie de Jong, pasi kapiteni i klubit ka pësuar një dëmtim në ligamentin anësor të gjurit dhe ka zgjedhur të mos i nënshtrohet menjëherë ndërhyrjes kirurgjikale.
Klubi katalunas shpreson që rikuperimi i holandezit të ecë sipas planit, por sipas raportimeve të “SPORT”, brenda Barcelonës ekziston shqetësimi se situata mund të komplikohen nëse trajtimi fillestar nuk sjell rezultatet e pritshme.
Frika e drejtuesve të Barcelonës lidhet me mundësinë që, në rast të mungesës së përmirësimit, operimi të bëhet i pashmangshëm, gjë që do ta zgjaste edhe më shumë periudhën e mungesës së De Jongut nga fushat e blerta.
Situata ka rikthyer kujtimet e rastit të Ansu Fatit, i cili në vitin 2022 kishte refuzuar ndërhyrjen kirurgjikale pavarësisht se klubi e konsideronte atë si zgjidhjen më të mirë. Edhe pse u rikthye në aksion, dëmtimet e vazhdueshme e penguan të rikthehej në nivelin e tij më të mirë.
Barcelona nuk dëshiron që një skenar i ngjashëm të përsëritet me kapitenin e saj. Klubi thuhet se ka mbetur i pakënaqur edhe me Federatën Holandeze të Futbollit dhe trajnerin Ronald Koeman, pasi De Jong vazhdoi të luante në Kupën e Botës 2026 pavarësisht shqetësimeve fizike.
Megjithatë, trajtimi konservativ është një mundësi e zakonshme për këtë lloj dëmtimi dhe shumë futbollistë arrijnë të rikthehen pa pasur nevojë për operacion. Për këtë arsye, Barcelona shpreson që rikuperimi i De Jongut të zhvillohet pa komplikime.
Mesfushori holandez pritet të monitorohet nga afër në javët e ardhshme, ndërsa klubi katalunas pret me interes reagimin e trupit të tij ndaj procesit të rehabilitimit.
KosovaPress
