Përfaqësuesja e Lartë e Bashkimit Evropian, Kaja Kallas, ka ngritur shqetësime serioze mbi rritjen e bashkëpunimit midis Rusisë dhe Kinës, si dhe përfshirjen e trupave koreano-veriore në luftën në Ukrainë
Gjatë fjalimit të saj në samitin për sigurinë globale në Singapor, Kallas tha se kur Rusia dhe Kina flasin për të “udhëhequr së bashku”, kjo përfaqëson një ndryshim rrënjësor në rendin e sigurisë ndërkombëtare – një zhvillim që, sipas saj, nuk është parë në 100 vitet e fundit.
“Ndaj të gjithë duhet të jemi të shqetësuar”, theksoi ajo, duke shtuar se siguria evropiane dhe ajo aziatike janë të ndërlidhura ngushtë, dhe se ruajtja e stabilitetit global varet nga mbrojtja e ligjit ndërkombëtar.
Kallas paralajmëroi se ligji ndërkombëtar është “kupola që garanton mbrojtjen”, veçanërisht për shtetet më të vogla, të cilat përballen me kërcënime nga aktorë më të fuqishëm.
Deklaratat vijnë në një kohë kur presidenti rus Vladimir Putin priti homologun e tij kinez Xi Jinping në Moskë, në kuadër të 80-vjetorit të fitores mbi nazizmin, një vizitë që përforcoi lidhjet strategjike midis dy vendeve.
