Tiranë, 5 maj 2025 – Ish-kryeministri Sali Berisha u paraqit sot në SPAK me veshje sportive, duke komentuar me ironi situatën aktuale politike dhe gjyqësore.
“Po shkoj drejt fushatës,” tha Berisha, duke shtuar se sportiviteti i ishte “imponuar nga ndryshimet klimatike”, megjithëse ai vetë nuk është adhurues i tij.
I pyetur për seancën e sotme gjyqësore dhe kërkesën e prokurorisë në lidhje me çështjen e tij, avokati Genc Gjokutaj deklaroi se nuk bëhet fjalë për një provë të re, por për një dokument ekzistues që tregon, sipas tij, falsifikimin e formularit të dekriminalizimit nga një gjyqtare.
“Kjo është prova që gjyqtarja ka deklaruar në formular se nuk është e dënuar, ndërkohë që ekziston një vendim penal nga një gjykatë greke,” tha Gjokutaj. Sipas tij, kjo sjell pasoja penale për falsifikim dokumenti.
Berisha përmbylli deklaratën me një mesazh të drejtpërdrejtë:
“E vërteta vonon, por nuk harron. U përpoqën ta fshehin për të mbrojtur nderin e drejtësisë Sorosiane, por morën turpin. Dhe do ta marrin turpin për çdo fshehje që i bëjnë krimit.”
Zyra e Medias dhe Komunikimit
Partia Demokratike
