Një zhvillim dramatik ka ndodhur sot në Prishtinë gjatë një aksioni policor për arrestimin e Bilall Kqikut, personit të shpallur në kërkim për përfshirje në rastin e vrasjes së rëndë në Kolovicë, raporton Gazeta Sinjali.
Sipas burimeve të Sinjalit brenda Policisë dhe Emergjencës, në momentin që forcat e rendit kanë ndërhyrë për ta ndaluar, Kqiku ka tentuar t’i shpëtojë ndalimit duke u hedhur nga kati i katërt i banesës ku po fshihej. Si rezultat, ai ka pësuar lëndime të rënda trupore dhe është dërguar menjëherë në QKUK, ku po trajtohet nën mbikëqyrje të Policisë.
Burime mjekësore konfirmojnë për Sinjalin se gjendja e tij është e rënduar, por për momentin stabile. Në Emergjencë janë parë forca të shumta policore si dhe prokurori i rastit, që kanë dalë për të ndjekur nga afër situatën.
Kujtojmë se Bilall Kqiku është një nga personat e dyshuar në një nga rastet më të rënda kriminale të këtij viti – vrasjen e trefishtë të ndodhur më 26 mars 2024 në rrugën “Butrinti” në Prishtinë. Ai, së bashku me disa të tjerë, dyshohet se qëlluan me armë zjarri drejt një veture me katër persona, duke lënë të vdekur Egzon Hazirin dhe duke plagosur rëndë të tjerët.
Rasti po trajtohet me prioritet nga Njësiti për Hetimin e Krimeve të Rënda, ndërsa Gazeta Sinjali do të publikojë detaje të reja posa të konfirmohen nga burime zyrtare.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
