Rusia ka luajtur një rol kyç në përhapjen e dezinformatave dhe gjuhës së urrejtjes gjatë zgjedhjeve parlamentare të 9 shkurtit në Kosovë, duke u përpjekur të minojë besueshmërinë e procesit zgjedhor dhe të destabilizojë vendin, janë gjetjet kryesore të raportit të publikuar sot nga Zyra e Bashkimit Evropian në Kosovë dhe Rrjeti Ballkanik për Gazetari Hulumtuese, BIRN Kosova.
Fushatat e dezinformimit dhe gjuhës së urrejtjes, sipas raportit, janë organizuar dhe mbështetur nga Kremlini dhe qeveria ruse, me ndihmën e mediave të financuara nga Rusia dhe aktorëve politikë në Serbi, raporton Ekonomia Online.
Shefi i Zyrës së BE-së në Kosovë, Aivo Orav, tha se dezinformimi përbën një kërcënim të drejtpërdrejtë për vetë thelbin e demokracisë.
Ai shtoi se raporti i publikuar zbulon se narrativat dezinformuese të zgjedhjeve të 9 shkurtit u përhapën, jo vetëm nga aktorët politikë vendorë, por edhe nga forca të jashtme, me qëllimin për të destabilizuar besimin e publikut në procesin zgjedhor të Kosovës.
Dezinformimi është më shumë se thjesht përmbajtje mashtruese. Ai përbën një kërcënim të drejtpërdrejtë për vetë thelbin e demokracisë, manipulon opinionin publik, nxit ndarjen dhe minon besimin tek institucionet. Ajo që është gjithashtu kritike për çdo proces zgjedhor është integriteti i informacionit dhe qasja e votuesve në informacion të saktë, të besueshëm dhe autentik”, tha Orav.
“Gjetjet e sotme, të bazuara në një analizë të gjerë të kryer nga BIRN Kosova do të shpjegojnë se si ky fenomen u manifestua gjatë periudhës zgjedhore, kush ishte pas tij dhe ndikimin e gjerë që kishte në procesin demokratik. Raporti zbulon se narrativat dezinformuese u përhapën jo vetëm nga aktorët politikë vendorë, por edhe nga forca të jashtme, me qëllimin për të destabilizuar besimin e publikut në procesin zgjedhor të Kosovës. Përhapja e gjuhës së urrejtjes dhe e gjuhës së dehumanizimit ishte alarmuese, me grupe dhe individë të caktuar që u shënjestruan në mënyrë disproporcionale, veçanërisht gratë në pozita me ndikim. Retorika politike u shndërrua në forma ekstreme të dehumanizimit dhe për fat të keq një pjesë e madhe e kësaj përmbajtjeje mbetet e qasshme nëpër platforma të ndryshme edhe sot. Gjetjet gjithashtu theksojnë rolin në rritje të mediave sociale në shpërndarjen e këtyre narrativave, veçanërisht përmes përmbajtjeve të gjeneruara nga inteligjenca artificiale dhe platformave anonime”, shtoi shefi i Zyrës së BE-së në Kosovë Orav.
Ndërsa, presidentja e Kosovës, Vjosa Osmani, tha se përhapja e lajmeve të rreme nuk është vetëm një sfidë për mediat, por një kërcënim i drejtpërdrejtë për sigurinë kombëtare dhe stabilitetin e shtetit.
“Në epokën në të cilën po jetojmë lajmi i rremë po përhapet shpejt, prandaj kjo nuk është vetëm një sfidë, por edhe një rrezik real edhe për stabilitetin e shtetit tonë, për integritetin tonë si shtet, për demokracinë, por mbi të gjitha për sigurinë kombëtare. Për këtë arsye, kontrollimi i fakteve duhet të bëhet një standard i përditshëm, që e zbaton secili prej nesh. Në kontekstin e sigurisë shtetërore, mosverifikimi i fakteve nuk është thjesht një problem etik apo profesional i medias, por shndërrohet në kërcënim serioz ndaj shtetit. Aktorë të huaj, veçanërisht Rusia dhe Serbia, siç e dini, kanë promovuar aktivisht dezinformimin dhe narrativat përçarëse për ta minuar besueshmërinë në proceset demokratike në Kosovë. Mediat, të mbështetura nga Rusia, kanë luajtur një rol në përhapjen e dezinfomatave mbi integritetin zgjedhor të Kosovës dhe nxitjen e tensioneve në rajonin tonë”, tha presidentja Osmani
