Deputetja e PDK-së, Blerta Deliu-Kodra, tha se Grupi Parlamentar i Vetëvendosjes është barrikaduar në një kandidate dhe se Kosova është në mëshirën e Albulna Haxhiut.
Duke folur para seancës ku për herë të 19-të do të bëhet përpjekja për konstituim të Kuvendit, Deliu-Kodra foli edhe për ftesën e kryetarit të Vetëvendosjes, Albin Kurti, për ta sfiduar nëse i ka numrat për qeverinë.
Ajo tha se po t’i kishte numrat do të mund të shihej edhe tash për kandidaten e tyre për kryeparlamentare.
“Po t’i kishte votat, jam e bindur që do ta shihnim me zonjën Haxhiu. Nuk mund t’i ketë votat për qeverinë e të mos i ketë votat e njëjta për kryetaren e Kuvendit”.
Ajo tha se intervista e djeshme e Kurtit ishte “për keqardhje që kryeministri tek kaq pas kohë të gjatë të përgjigjet në pyetjet e gazetarëve dhe në këtë rast zgjodhi mediumin publik”.
“Ishte etiketa e njëjtë, propaganda e njëjtë dhe qasja e njëjtë me të cilën Kurti flet para opinionit publik tash e sa kohë. Nuk do t’i komentoj deklaratat e tij sepse në fund përgjegjësia për t’i hapur rrugë perspektivës dhe zhvillimit të Kosovës varet nga koalicioni që ka fituar numrin më të madh të mandatave”.
Ajo tha se Kurti të reflektojë dhe t’i hapë rrugë krizës në të cilën ka mbetur Kosova. /Express/
