Në gjykimin lidhur me vrasjen afër lokalit “Kobra City” ka dëshmuar ish-punëtori i lokalit, Kujtim Gashi. Dëshmitari tha se i akuzuari për vrasje, Dibran Hoxhaj, sa ishte në parking e urdhëroi ta pastronte brendinë e lokalit ku ndodhi rrahja që i parapriu vrasjes së viktimës Visar Cengu. Ai tha po ashtu se brenda lokalit i pa të gjithë të akuzuarit e tjerë përveç Roland Susurit, që po akuzohet për manipulim me prova
Kujtim Gashi, ish-punëtor i lokalit “Kobra City”, ka dëshmuar në rastin ku Dibran Hoxhaj po akuzohet për vrasjen e klientit të lokalit, Visar Cengu. Në këtë rast për vepra të ndryshme penale akuzohen edhe katër të akuzuar të tjerë.
Gashi, në seancë gjyqësore mbajtur të mërkurën, tha se kryesisht është marrë me pastrimin e lokalit, por në natën e vrasjes lëvizte vazhdimisht me veturë për të siguruar naftë për gjeneratorin, dhe se nuk i rastisi të ishte dëshmitar i vrasjes.
Ai u shpreh se Hoxhaj, që mban nofkën “Kobra”, i tha ta pastronte lokalin ku ndodhi rrahja, e cila i parapriu vrasjes.
“Dibran Hoxhën e kam parë duke biseduar me policët… Më tha hyr e pastroje lokalin dhe unë e kam vazhduar punën time, me pastrim të lokalit”, tha Hoxha.
Këtë nuk e kontestoi i akuzuari i cili i parashtroi pyetje dëshmitarit, ish-punëtor në lokalin e tij.
“A të kujtohet kur të thashë ty dhe atij tjetrit kamerier që ka qenë, mblidhini gjërat, tavolinat e thyera që ato çka mund të rregullohen te komshiu afër që të rregullohen e që deri në mbrëmje të jetë lokali gati”, tha Hoxhaj tek i shtroi pyetje dëshmitarit. E dëshmitari Gashi pohoi atë që tha Hoxhaj.
Fillimisht, sipas tij, policia e cila e arrestoi Dibran Hoxhajn nuk ndërhyri në brendi të lokalit, por erdhi një ekip tjetër i policisë, i cili ia ndërpreu pastrimin e lokalit.
“Nuk na kanë lënë as kohë që ta pastrojmë”, tha dëshmitari.
Dëshmitari Gashi tha po ashtu se të gjithë të akuzuarit i pa në lokal përveç Roland Susurit.
Gashi u shpreh se nuk vërejti lëndime te i dëmtuari Rutgen Shehu, të cilin e shihte derisa hynte e dilte nga lokali dhe disa ditë më vonë e kuptoi se ai ishte plagosur.
Dëshmitari tha se s’donte të përfshihej në rrahje, meqë nuk kishte dalë nga shtëpia për t’u përfshirë në konflikte, por për ta mbajtur familjen.
Prokuroria Speciale akuzon Dibran Hoxhajn për vrasje të rëndë të viktimës Visar Cengu afër lokalit “Kobra City” që gjendet në magjistralen Prishtinë-Zhur, më 3 janar 2023. Hoxhaj akuzohet edhe për mbajtje në pronësi ose kontroll të paautorizuar të armëve.
Të akuzuar në këtë rast janë edhe Roland Susuri, Arben Vezaj, Burim Mazreku dhe Jesmir Badallaj. Ata akuzohen për pjesëmarrje në rrahjen e tre klientëve të lokalit.
Susuri dhe Mazreku po ashtu akuzohen lidhur me veprën penale manipulim me provat e krimeve që ndodhën në natën kritike.
Motivi i vrasjes sipas aktakuzës ishte një faturë 400-euroshe, të cilën të dëmtuarit nuk u pajtuan ta paguanin. Dibran Hoxhaj i njohur si Kobra është i njohur si person që ka rënë ndesh me ligjin duke u shpallur fajtor për pjesëmarrje në rrahje. Ai është dënuar 16 herë nga Gjykata në Prizren, mirëpo me dënime me gjobë e me kusht, e asnjëherë me burgim efektiv
