Rrezikimi i personave nën mbrojtje ndërkombëtare sanksionohet me Kodin Penal të Republikës së Kosovës dhe kushdo që kryen një sulm mbi objektet zyrtare, vendbanimin privat ose në mjetet e transportit të një personi nën mbrojtje ndërkombëtare, rrezikon të dënohet me burgim deri në 10 vjet. Për një rast të tillë që po dyshohet se ka ndodhur ditën e djeshme, Prokuroria Themelore në Prishtinë ka iniciuar rast, raporton ekskluzivisht Gazeta Sinjali.
Siç merr vesh Sinjali, Policia u alarmua nga Kontrolli i trafikut ajror në Aeroportin Ndërkombëtar të Prishtinës, pas marrjes së një informacioni nga piloti i një helikopteri të KFOR-it.
Burimet e Sinjalit kanë bërë me dije se bazuar në dyshimet e para, dikush ka kryer sulm duke ia vendosur laserin pilotit të helikopterit, gjatë kryerjes së detyrës.
Ndonëse akoma nuk dihet nëse është zbuluar personi i dyshuar në këtë rast dhe cilat janë rrethanat e tjera, Policia ka ndërmarrë veprimet e nevojshme.
Në konsultim me Prokurorin e Shtetit, kanë nisur hetimet në drejtim të veprës penale “Rrezikimi i personave nën mbrojtje ndërkombëtare”.
Ndryshe, dritat e laserit të drejtuara në drejtim të aeroplanit apo helikopterit mund të bartin pasoja të mëdha, pasi që ndriçimi i lartë si pasojë e laserit mund të shkaktojë verbim të pilotit për disa sekonda gjë e cila mund të jetë shkak për aksident ajror.
