Një hetues në Sektorin e Hetimeve të Përgjithshme në Suharekë është suspenduar përkohësisht, pasi dyshohet se për gjashtë vite me radhë ka përdorur një veturë të paregjistruar duke shfrytëzuar pozitën zyrtare për të shmangur pasojat ligjore.
Bëhet fjalë për zyrtarin policor Milaim Gashi, i cili, sipas informacioneve të verifikuara, që nga qershori i vitit 2019 ka vozitur një automjet privat pa regjistrim të vlefshëm, të cilin e parkonte përballë Stacionit Policor në Suharekë. Në raste ndalimesh nga patrullat policore, ai dyshohet se ka përdorur autoritetin e tij për të shmangur kontrollet apo masat ndëshkuese.
Pas pranimit të një informate nga Inspektorati Policor i Kosovës dhe konsultimeve me Prokurorinë kompetente, janë ndërmarrë veprime paraprake dhe Gashi është ndaluar në rrugë duke drejtuar veturën në fjalë. Më pas, Njësia Rajonale e Trafikut në Prizren ka marrë masat përkatëse ligjore.
Me rekomandim të IPK-së, ndaj tij është caktuar suspendim për 3 ditë pune, ndërsa hetimet për veprën penale “Keqpërdorim i pozitës apo autoritetit zyrtar” po vazhdojnë.
Gazeta Sinjali ka mësuar ekskluzivisht detajet nga burime brenda Policisë në Suharekë.
Shënim: Personi i përmendur në këtë artikull prezumohet i pafajshëm derisa fajësia të mos i vërtetohet me vendim të formës së prerë nga gjykata.
