Gjakovë, 6 korrik 2025 – Një ngjarje e rëndë ka ndodhur ditën e djeshme në Gjakovë, ku një 21-vjeçar ka humbur jetën si pasojë e lëndimeve të marra në vendin e punës.
Sinjali mëson se viktima është Bujar Zeka, i cili ishte duke punuar në fabrikën e tullave “IMN Dukagjini” në rrugën “Gjergj Sokoli” kur ka pësuar lëndime të rënda. Fillimisht ai është dërguar në emergjencën e spitalit të Gjakovës, ndërsa më pas është transferuar në Qendrën Klinike Universitare të Kosovës (QKUK), ku nuk ka mundur t’u mbijetojë plagëve.
Burime të afërta kanë bërë të ditur se varrimi i të ndjerit do të bëhet sot në ora 16:00, në varrezat e qytetit të Gjakovës.
Autoritetet kompetente kanë nisur hetimet për të zbardhur rrethanat e aksidentit tragjik.
