Luis Enrique është një nga fituesit më të mëdhenj të këtij edicioni të Ligës së Kampionëve, pas triumfit historik të PSG-së.
Ky është titulli i parë evropian për klubin francez, i arritur me një dominim absolut në finale duke mposhtur Interin 5-0.
Në konferencën pas finales, trajneri spanjoll nuk e fshehu emocionin. Ai ndau gëzimin me gazetarët dhe gjeti një moment për të kujtuar vajzën e tij, Xana, e cila ndërroi jetë në vitin 2019.
“Xana është gjithmonë me mua, në fitore dhe madje edhe më shumë në humbje”, tha Enrique.
“Ajo është pjesë e familjes sime, që gjithmonë më mbështet. Nuk është koha për trishtim, ajo do të jetë gjithmonë me ne.”
Ai komentoi edhe banerin që i ishte dedikuar nga tifozët e PSG-së, duke e cilësuar si një gjest “të pabesueshëm” dhe shumë prekës për të dhe familjen e tij.
Në lidhje me Kylian Mbappe, tashmë lojtar i Real Madridit, Enrique tregoi klas duke folur për të.
“Do të na kishte pëlqyer ta kishim Mbappen, por ai zgjodhi ndryshe. Ne kemi treguar se te PSG-ja, yjet janë në shërbim të ekipit, jo e kundërta”, tha Enrique.
Pas ndeshjes, Enrique hoqi fanellën e PSG-së dhe veshi një bluzë të veçantë nga ‘Fondacioni Xana’. Në të ishte vizatuar një moment i paharrueshëm nga Berlini, që përfaqësonte emocionin dhe lidhjen familjare.
Ndërkohë, tifozët e PSG-së kishin përgatitur një surprizë në tribuna: një banderolë gjigante kushtuar Xanas dhe familjes Enrique, që përforcoi edhe më shumë ndjesinë njerëzore të këtij suksesi të madh./Raporto24/
