Bashkimi Europian është “gati për të negociuar” me Shtetet e Bashkuara dhe ka ofruar t’i heqë tarifat për mallrat industriale, tha të hënën presidentja e Komisionit Europian, Ursula von der Leyen, raporton CNN.
“Këto tarifa para së gjithash kanë një kosto të madhe për konsumatorët dhe bizneset amerikane, por, në të njëjtën kohë, ato kanë një ndikim të madh në ekonominë globale”, tha shefja ekzekutive e BE-së në një konferencë për shtyp në Bruksel.
Pas njoftimit të presidentit amerikan Donald Trump javën e kaluar për tarifa të larta ndaj dhjetëra vendeve, eksportet e BE-së drejt SHBA-së përballen me një tarifë “reciproke” prej 20%, ndërsa sektori i çelikut dhe makinave përballet me një tarifë prej 25%. Von der Leyen tha se këto tarifa, që kanë shkaktuar tronditje në tregjet globale, përbëjnë një “pikë kthese madhore” për SHBA-në.
“Megjithatë, ne jemi të gatshëm të negociojmë me Shtetet e Bashkuara. Në fakt, ne kemi ofruar tarifa zero për mallrat industriale, ashtu siç kemi bërë me shumë partnerë të tjerë tregtarë, sepse Europa është gjithmonë e gatshme për një marrëveshje të mirë”, tha ajo.
E pyetur se kur BE-ja e ka paraqitur ofertën për tarifa zero, von der Leyen tha se ajo është bërë “shumë kohë përpara” njoftimit të fundit të Trump për tarifa dhe “në mënyrë të përsëritur, për shembull, në sektorin e automobilave”. Ajo theksoi se BE-ja e ka zbatuar prej kohësh modelin “zero për zero” me vende të tjera që gjithashtu kanë një sektor të fortë automobilistik.
Në të njëjtën kohë, BE-ja është e gatshme të luajë ashpër: Megjithëse BE-ja do të preferonte ta arrinte një “marrëveshje të negociuar”, blloku gjithashtu është “duke përgatitur një listë të mundshme (të importeve nga SHBA) për masa hakmarrëse”, tha
