Ndeshja e sotme finale e Kupës së Botës 2026 ndërmjet Argjentinës dhe Spanjës në stadiumin “MetLife” nuk është thjesht një betejë për trofeun e madh, por shënon zyrtarisht fundin e një epoke të jashtëzakonshme për futbollin botëror.
Lionel Messi, në moshën 39-vjeçare, do të zbresë për herë të fundit në skenën e një Botërori, duke mbyllur një rrugëtim dy-dekador të mbushur me magji.
Sipas një analize të publikuar nga The Athletic, kjo finale pritet të shënojë fundin e rrugëtimit të njërit prej futbollistëve më të mëdhenj në histori në turneun më prestigjioz të futbollit.
Ndryshe nga viti 2022 kur Messi kishte lënë të kuptohej se po mbyllte ciklin e tij në Botëror, kësaj radhe gjithçka tregon se finalja kundër Spanjës do të jetë paraqitja e tij e fundit në Kupën e Botës.
“Këtë herë do të jetë vërtet fundi. Finalja ndaj Spanjës pritet të jetë ndeshja e fundit e Lionel Messit në skenën e Kupës së Botës.”
Edhe pse modelet parashikuese dhe bastet favorizojnë Spanjën e riut Lamine Yamal për shkak të lojës së tyre më kohezive,
The Athletic thekson se pavarësisht rezultatit të finales – e cila është ndeshja e 1,196-të e karrierës së tij – madhështia e Messi-t është tashmë e vulosur.
Kthimi i tij i madh pas vitit 2016, ku fitoi dy Kupa Amerika dhe Botërorin e vitit 2022, e transformoi atë nga një talent i mbyllur në një lider të vërtetë.
“Nuk ka shumë kuptim të sugjerohet se trashëgimia e tij varet nëse, në moshën 39-vjeçare, ai është i aftë ose jo ta udhëheqë Argjentinën drejt një titulli të dytë botëror. Madhështia e tij është provuar tashmë pa fund,” përfundon The Athletic.
Për miliona adhurues të futbollit në mbarë globin, përballja e sotme e orës 21:00 do të jetë mundësia e fundit për të parë gjeniun argjentinas në kompeticionin më të madh të planetit, duke shpresuar në një tjetër shkëndijë magjie përpara se shkopi i stafetës t’u kalojë talenteve të reja.
