Gjashtë deputetë të Kuvendit të Serbisë në takim me kryeministrin e Kosovës Albin Kurti, kanë deklaruar se e njohin pavarësinë e Kosovës dhe se e përkrahin Qeverinë Kurti në mbrojtjen e të drejtave të shqiptarëve në Serbi.
“Gjashtë deputetë të Kuvendit Popullor të Serbisë e njohin pavarësinë e Kosovës dhe e përkrahin Qeverinë Kurti. Z. Sylejman Ugljanin, kryetar i Partisë Aksioni Demokratik i Sanxhakut, z.Shaip Kamberi, shef i Grupit parlamentar “Lugina e Bashkuar – SDA Sanxhak”, deputetët z.Enis Imamoviq, znj.Nadije Beqiri, z.Mirsad Hodzhiq, z.Argjend Bajrami, z.Selma Kuçeviq, ia shprehën gjithë përkrahjen e tyre Kryeministrit të Republikës së Kosovës, Albin Kurti në takimin që patën sot në zyrën e tij në Qeverinë e Republikës së Kosovës”.
Në takim kryetari i partisë SDA Sulejman Ugljanin, e ka falenderuar të parin e ekzekutivit kosovar për miratimin në Kuvendin e Kosovës të rezolutës që dënon gjenocidin në Srebrenicë.
Ai tha se boshnjakët janë shumë mirënjohës që Kuvendi i Kosovës u rreshtua në anën e së drejtës dhe dënoi krimin më të madh në Evropë, pas Luftës së Dytë Botërore, kur 8 mijë burra e djem boshnjakë u vranë e u masakruan në një ditë nga forcat serbe të sigurisë.
“Z. Ugljanin theksoi se deputetët e koalicionit “Lugina e Bashkuar – SDA Sanxhak” e njohin pavarësinë dhe shtetin e Kosovës. Ai tha se e përkrahin kryeministrin Kurti dhe Qeverinë e Kosovës në angazhimin për mbrojtjen e të drejtave të shqiptarëve në Serbi. Duke mbrojtur të drejtat e shqiptarëve ju po mbroni edhe të drejtat e boshnjakëve, tha z. Ugljanin. Ai e vlerësoi qasjen e kryeministrit Kurti për vendosjen e reciprocitetit të të drejtave të pakicave kombëtare në Kosovë dhe në Serbi. Ky është ilaçi i zgjidhjes së problemeve të pakicave në Ballkan, shtoi ai.”, njofton Qeveria e Kosovës përcjell Klankosova.tv
Deputetët po ashtu e njoftuan kryeministrin Albin Kurti, për funksionimin e organeve ekzekutive të Këshillave nacionalë, ata thanë se Këshilli Nacional Boshnjak në Serbi i ka 35 anëtarë dhe 7 delegatë në bordin ekzekutiv.
Ndërsa Asambleja e Këshillit Nacional Shqiptar i ka 15 anëtarë.
Në anën tjetër shefi i Qeverisë Albin Kurti, tha se aktualisht gjysma e Sanxhakut ndodhet në NATO e gjysma jo.
“Duke u bazuar në faktin që një pjesë e Sanxhakut ndodhet në Serbi e tjetra në Mal të Zi”.
Ai ritheksoi se Serbia duhet të distancohet nga e kaluara e përgjakshme dhe politika e Sllobodan Millosheviqit.
“Pa u distancuar dhe pa e bërë Serbia një introspeksion për të kaluarën e saj, nuk mund të ecet drejt të ardhmes dhe normalizimit të raporteve me Kosovën”.
