Sot në orët e paradites, Inspektorati Shëndetësor i Ministrisë së Shëndetësisë ka kryer një inspektim të paparalajmëruar në “Spitalin Amerikan 2”, i cili ndodhet vetëm pak kilometra larg kryeqytetit, në zonën e Graçanicës.
Sipas burimeve të KosovaNews, gjatë këtij kontrolli, inspektorët shëndetësorë kanë kapur në flagrancë tre mjekë me shtetësi turke duke punuar pa licencë të lëshuar nga institucionet përkatëse të Kosovës.
KosovaNews i është drejtuar me pyetje Ministrisë së Shëndetësisë për të marrë më shumë informacione në lidhje me këtë rast, por deri në momentin e publikimit të këtij artikulli nuk kemi marrë një përgjigje zyrtare.
Kujtojmë se pronari i “Spitalit Amerikan” është Klodian Allajbeu, i cili njëkohësisht është pronar edhe i Gazetës Express dhe televizionit T7.
Në dhjetor të vitit të kaluar Prokuroria Speciale kishte aktakuzë ndaj Allajbeut dhe pronarit të televizionit Dukagjini, Ekrem Lluka për shpëlarje parash.
