Fenerbahce po lëviz me intensitet në afatin kalimtar dhe ka vënë në shënjestër sulmuesin kanadez Jonathan David, i cili është aktualisht lojtar i lirë pas skadimit të kontratës me Lille.
Sipas raportimeve nga Haber Global TV, gjigantët turq kanë bërë një ofertë verbale me vlerë 55 milionë euro për një marrëveshje trevjeçare – shumë që përfshin pagën, bonusin e nënshkrimit dhe tarifat për agjentët.
Interesi i Fenerbahçes është serioz dhe sinjalizon ambicie të qarta për të ndërtuar një skuadër pretendente në sezonin e ri, por vetë David, 25 vjeç, po tregohet i kujdesshëm dhe po shqyrton edhe oferta të tjera nga klubet evropiane përpara se të marrë vendimin përfundimtar.
Në sezonin e kaluar, ai ishte një nga lojtarët më të spikatur të Ligue 1, duke shënuar 25 gola dhe dhënë 12 asistime në 49 ndeshje për Lille, formë që e ka bërë një emër të nxehtë në këtë verë.
Jose Mourinho ka kërkuar sulmues të klasit, pasi Edin Dzeko është larguar pas dy vitesh qëndrim.
Transferimi i tij do të ishte një goditje e madhe për Fenerbahçen dhe një mesazh i qartë për rivalët në Turqi dhe më gjerë. /Telegrafi/
