Sot, më 2 qershor 2025, në Prishtinë, Presidentja e Republikës së Kosovës, Vjosa Osmani, dekoroi Kada Hotić, një nga zërat më të fuqishëm të kujtesës dhe drejtësisë pas gjenocidit të Srebrenicës.
Kada Hotić, nënkryetare e shoqatës “Nënat e Srebrenicës dhe të Rrethinës së Žepës”, humbi 56 anëtarë të familjes në gjenocidin e korrikut 1995, përfshirë djalin e saj Samir, bashkëshortin Sead, dy vëllezër dhe një kunat. Që atëherë, ajo është angazhuar pa pushim në kërkim të drejtësisë dhe në ruajtjen e kujtesës kolektive për viktimat e masakrës,shkruan Raporto24
Në ceremoninë e mbajtur në Prishtinë, Presidentja Osmani vlerësoi kontributin e Hotić në përpjekjet për drejtësi dhe të vërtetën historike, duke theksuar rëndësinë e kujtesës për të parandaluar përsëritjen e tragjedive të tilla.
Ky dekorim është një njohje e përkushtimit të Kada Hotić dhe një mesazh i fuqishëm solidariteti nga Kosova për të gjitha viktimat dhe të mbijetuarit e gjenocidit në Srebrenicë./Raporto24/
