Më 6 shkurt 1958, bota e futbollit u trondit nga një prej tragjedive më të mëdha në historinë e sportit – katastrofa ajrore e Mynihut, që i mori jetën 23 personave, përfshirë 8 futbollistë të Manchester United.
Skuadra angleze po kthehej nga një ndeshje e Kupës Evropiane ku kishte triumfuar ndaj Yllit të Kuq të Beogradit. Pas ndalesës në Beograd, avioni i linjës “British European Airways” u ul në aeroportin e Mynihut për t’u furnizuar me karburant. Në përpjekjen për të ngritur avionin nga pista e mbuluar nga bora e dendur, mjeti fluturues u rrëzua tragjikisht.
Në mesin e viktimave ishin lojtarë të njohur, staf teknik, gazetarë dhe anëtarë të ekuipazhit. Bobby Charlton, vetëm 20 vjeç në atë kohë, ishte ndër të paktët që shpëtuan mrekullisht nga rrënojat dhe më vonë u bë një prej ikonave të futbollit anglez dhe fitues i Kupës së Botës më 1966.
Të vdekurit përfshinin: Roger Byrne (kapiteni) Eddie Colman Mark Jones Duncan Edwards (vdiq dy javë më vonë në spital) David Pegg Tommy Taylor Liam Whelan Geoff Bent
Trajneri legjendar Matt Busby mbijetoi dhe pas disa muajsh rikuperimi, ndërtoi një ekip të ri, të cilin e udhëhoqi drejt lavdisë në vitin 1968, kur Manchester United fitoi për herë të parë Kupën e Kampionëve Evropianë, duke e realizuar ëndrrën e djemve të rënë në Mynih.
Kjo ngjarje mbetet një plagë e thellë në historinë e futbollit dhe Manchester United. Çdo 6 shkurt, klubi dhe tifozët në të gjithë botën përkulen në nderim të viktimave./Raporto24
