Një person ka ndërruar jetë dhe një tjetër është plagosur si pasojë e të shtënave me armë mbrëmë në lokalin “Kobra City” në Prizren.
Sipas dyshimeve të Prokurorisë, pronari i lokalit “Kobra City”, Dibran Hoxha, dyshohet se ka shtënë me armë zjarri ndaj dy shtetasve të Shqipërisë të cilët ishin duke u larguar me veturë nga parkingu i lokalit në fjalë, pas një përleshje fizike që kishin pasur me punonjësit e lokalit në ambientin e brendshëm.
Por, këto akuza i ka mohuar vetë pronari i lokalit, Dibran Hoxha, i cili është mbrojtur në heshtje.
Në një prononcim për lajmi.net, avokati i Hoxhës, Nexhat Elshani, ka deklaruar se klienti i tij nuk e ka pranuar fajësinë.
“Është mbrojtur në heshtje. Nuk e ka pranuar fajësinë. Momentalisht janë pesë persona të ndaluar për 48 orë. Kaq janë informacionet deri më tani, kryesorja është që klienti nuk e ka pranuar fajësinë”, ka deklaruar Elshani.
Kujtojmë se sipas raportimeve, dy shtetasit e Shqipërisë pas sherrit brenda lokalit “Kobra City”, kishin dalë jashtë për t’u larguar nga lokali, ndërsa janë plagosur derisa ishin në veturë. Si pasojë e plagëve të marra, njëri shtetas i Shqipërisë ka ndërruar jetë gjatë rrugës për në Spitalin Rajonal të Kukësit, ndërsa personi tjetër është jashtë rrezikut për jetë. /Lajmi.net/
