Kombëtarja e Kosovës ka shënuar një tjetër fitore bindëse, këtë herë ndaj Kombëtares së Komoreve me rezultat 4-2, në një ndeshje të zhvilluar në stadiumin “Fadil Vokrri” në Prishtinë.
Takimi nisi me dominim të lehtë nga “Dardanët”, të cilët e qarkullonin topin me kujdes në kërkim të rasteve për gol. Megjithatë, ishin mysafirët ata që kaluan të parët në epërsi, kur në minutën e 12-të Said Bakari realizoi me kokë për 0-1.
Kosova reagoi shpejt dhe në minutën e 19-të barazoi rezultatin përmes Albion Rrahmanit, i cili realizoi një gol të bukur për 1-1. Në pjesën e dytë, Rrahmani shkëlqeu me dy gola të tjerë – në minutën e 59-të për 2-1 dhe në minutën e 78-të për 3-1 – duke kompletuar het-trikun e tij,shkruan Raporto24
Komoret ngushtuan rezultatin në minutën e 85-të me golin e Rafiki Said për 3-2, por Fisnik Asllani vulosi fitoren në minutën e 91-të me një gol të bukur për rezultatin përfundimtar 4-2.
Pas përfundimit të ndeshjes, atmosfera festive vazhdoi edhe jashtë fushës. Këngëtari i njohur Meda, i pranishëm në stadium bashkë me familjen, kërkoi të bëjë foto me sulmuesin Fisnik Asllani – dëshirë që e ndanë edhe fëmijët e tij.
Kjo është fitorja e dytë radhazi për Kosovën këtë muaj, pas triumfit 5-2 ndaj Armenisë, duke reflektuar formën e mirë të ekipit në këto ndeshje miqësore./Raporto24/
