Kryetari i Lëvizjes Vetëvendosje, Albin Kurti pas situatës së krijuar me moskonstituimin e Kuvendit, i është drejtuar me një letër publike kryetarit të Lidhjes Demokratike të Kosovës, Lumir Abdixhiku, ku e ka ftuar për të arritur një marrëveshje politike për bashkëqeverisje.
Lidhja Demokratike e Kosovës ka konfirmuar pranimin e kësaj letre, duke thënë se Kurtit do t’i kthejnë përgjigje me kohë.
Kështu është shprehur për Telegrafin, zëdhënësi i LDK-së njëherit edhe deputet i kësaj partie, Besian Mustafa.
Kryetari Abdixhiku do të kthejë përgjigje me kohë”, tha Musatafa.
Letra e Kurtit u publikua vetëm pak orë më parë, ku ai i bënte thirrje Abdixhikut që të ulen për të diskutuar një marrëveshje politike për formimin e institucioneve.
Ky zhvillim vjen në një kohë të tensionuar politike, pasi Kuvendi i Kosovës ka dështuar për të njëmbëdhjetën herë të konstituohet, ndërsa skenarët për zgjedhje të reja janë gjithnjë e më të pranishëm në diskursin publik. /Raporto24/
