Në Ditën e çlirimit të Komunës së Drenasit, me rastin e zbulimit të shtatores së heroit, Asllan Fazliu, në fjalën e tij, kryetari i kësaj komune, Ramiz Lladrovci, ka theksuar se Drenasi nga sot është më i bukur me shtatoren e heroit, Asllan Fazliu-Komandant Luani.
Guximi i tij, do të jetë amanet për breza se në momentet vendimtare për jetë e vdekje, nuk i lëshojmë pozicionet e as i frikohemi vdekjes duke i mbrojtur ato, ka shkruar Lladrovci.
Postimi i tij në rrjetin social: Me rastin e Ditës së çlirimit të Komunës së Drenasit, u përurua shtatorja e Heroit Asllan Fazliu – Komandant Luani, në prani të personaliteteve dhe qytetarëve të shumtë, mbajta këtë fjalë rasti:
E nderuara bashkëshorte e Komandant Luanit, zonja Ajshe, bija të heroit, Lirie, Qëndresë, Bjondinë, I nderuari Liridon, Sot, po fillon një kapitull i ri për heroin tonë në broz, Asllan Fazliun-Komandant Luanin. Ai bëhet banor i përhershëm i qytetit të Drenasit, i përjetësuar në bronz, këtu, në mesin tonë, ku zhvillohet jeta e qytetarëve të lirë. Qyteti i Drenasit, nga sot, do të jetë edhe më i bukur, edhe me ma shumë vlerë, sepse, po i vije një hero, i cili me bindje, me zemër dhe me vepër, dëshmoi se liria është më e vlefshme se jeta.
Ai e dëshmoi se ne e meritojmë lirinë. Po, është Asllan Fazliu i Gradicës. I Gradicës heroike, i fshatit të skajshëm të komunës që ndër shekuj ishte strehë e lirisë. Në Gradicë, lindën trima sikur të këngëve kreshnike që bartin historinë e qëndresës brez pas brezi. Nga ky fshat i vogël, por me histori të madhe, dolën trima si Tahir Gradica, Lec Gradica, Mehmet Gradica, për të kurorëzuar shekullin e lirisë me Ushtrinë Çlirimtare të Kosovës, Asllan Fazliu-Komandant Luani, me bashkëluftëtarë e vëllezër të pushkës e gjakut, dëshmorët Milazim Fazliu dhe Mehdi Fazliu, dëshmorja Antigone Fazliu, Doktori i plagëve të lirisë, Lec Leci, dëshmorët Muhamet Dervishi, Mehmet Saliuka, Hashim Uka dhe martirë të shumtë që kurrë nuk iu nënshtruan pushtuesit serb. Qyqavica ishte shtëpia besnike e kaçakëve me dekada, nga ajri i pastër rrëzë këtij mali, Gradica jetonte jetën, nga beteja në betejë.
Edhe kur nuk kishte liri, Gradica nuk nënshtrohej. Asllani, i biri i Zymerit dhe Ajetes, të cilin kam pasur fatin ta njoh në barrikadat e demonstrata, megjithëse pak më i moshuar se unë, herët do të radhitej drejt kauzës kombëtare.
Ai do të njihej më për së afërmi me Fehën dhe atdhetarët e viteve ’80. Torturat e pushtuesit ndaj familjarëve të tij, gjatë viteve ’90, do ta forconin edhe më shumë idealin e tij për çlirim nga okupatori, duke u interesuar që të shtrëngonte radhët e UÇK-së, në fillimet e saj. Ai u vu në dijeni të aktivitetit çlirimtar të Komandantit Adem Jashari dhe pak para fillimit të Epopesë së UÇK-së, më 3 mars kishte kontaktuar me të dhe e pranon në radhët e UÇK-së, dhe ngarkohet me armë automatike PKT. Rënia e Komandantit tonë legjendar Adem Jasharit dhe Jasharajve në Prekaz, Komandant Luanin e bëjnë më të vendosur se kurrë, për çlirimin e vendit.
Ardhja e Fehës në pranverën e vitit 1998, ia fuqizon bindjen se tashmë, rruga e çlirimit ishte e pakthyeshme, duke u bërë pjesë e radhëve më aktive të UÇK-së. Asllan Fazliu, si një luftëtar i përkushtuar, mori pjesë në shumë beteja, bashkëluftëtarët e tij të gjallë, dëshmojnë se Komandant Luanit nuk i trembej syri as nga lufta e as nga pasojat e saj. Ai e kishte ndarë mendjen për çlirim, pavarësisht çmimit që do ta paguante. Heronjtë janë si Asllan Fazliu, besnik, i devotshëm, i përmbajtur, trim, guximtar. Ai do të dëshmohej në shumë beteja. Lidhur me talentin e tij luftarak, mund të flasin bashkëluftëtarët e tij. Trimëria e tij, është trashëgimi për brezat. Komandant Luani, në shtatorin e vitit 1998 do të bënte qëndresë, edhe kur së pari bie në altarin e lirisë, heroina Fatime Hetemi.
Ai do të ishte më i afërti në çastet e fundit të heroit e heroinës, Fehmi e Xhevë Lladrovci. Ai në zjarrin e luftës, ku sulmet e armikit në pikën ku qëndronte Feha dhe Xheva me bashkëluftëtarë do të goditet rëndë dhe kur kishte filluar heshtja e krismave nga pika ku ishin ata, Komandant Luani do ta lëshonte pikën ku ishte i ngarkuar për luftime dhe do të shkojë te pozicioni ku u përjetësuan Fehmiu e Xheva. Guximi i tij, do të jetë amanet për breza se në momentet vendimtare për jetë e vdekje, nuk i lëshojmë pozicionet e as i frikohemi vdekjes duke i mbrojtur ato.
Të nderuar qytetarë, E nderuara Familje Fazliu, Liria e Kosovës është fryt i përpjekjes së shumë gjeneratave për liri. Brezit tonë, historia ia caktoi barrën më të rëndë, fillimin e luftës për liri. Në këtë luftë çlirimtare, do të dëshmohen bijat dhe bijtë më të devotshëm të kombit.
Asllan Zymer Fazliu, i takon më të mirëve të kombit, i takon të tashmes tonë që e shohim idealin e tij të realizuar, njëherësh, i takon së ardhmes se si duhet atdheu. Kjo shtatore, është dëshmi se qëndresa e Komandant Luanit, është shembull për gjenerata. Ajo qëndresë nuk do të harrohet kurrë, ndërsa familja Fazliu, do të jetë përgjithmonë e nderuar që lindi e rriti trim si Asllan Fazliu.
Ashtu si ishin bashkë me Fehën e Xhevën, Fatime Hetemin, Shefqet Zekën, vëllezërit Kadri, Avdi dhe Xhevdet Karaqica dhe shumë dëshmorë tjerë, ata janë sot bashkë në Memorialin e dëshmorëve në Gllanasellë. Sot e gjithmonë, këtu, për festa, ashtu si në ditët e përkujtimit të lavdisë tonë, do të përkulemi me nderim dhe do të vendosim lule të freskëta për heroin Asllan Fazliu, Komandant Luanin.
I përjetshëm është kujtimi për të! Nderim i përjetshëm për familjen Fazliu që dha shumë kontribut për lirinë e Kosovës! Lavdi Ushtrisë Çlirimtare të Kosovës!
