Nën patronatin e kryeministrit në detyrë të Republikës së Kosovës, Albin Kurti, sot u mbajt mbledhja komemorative në nderim dhe përkujtim të jetës dhe veprës së Bujar Bukoshit, ish-kryeministrit të Kosovës.
Kjo mbledhje që u mbajt në ambientet e Amfiteatrit të ri të Bibliotekës Qendrore Universitare, në Prishtinë, filloi me një minutë heshtje, për të nderuar figurën e ish-kryeministrit Bukoshi.
“Teksa vitet kalojnë, ne fitojmë pozicione pikëpamjesh të reja për zhvillimet e mëhershme politike dhe historike edhe të viteve ’90-ta, kur Bukoshi ishte ndër protagonistët kryesor. Ndër rrjedhën e pandërprerë të kohës, historianët do të gjurmojnë dhe studiojnë angazhimin dhe veprimtarinë e Bujar Bukoshit, kur do të shkruajnë historinë moderne politike të Kosovës. E në të, emri i tij do të jetë natyrshëm ndër më të përmendurit, më të spikaturit për veprën e tij që duhet vendosur saktë në kontekstin e kohës dhe interpretuar ndër rrethanat e asaj periudhe”, tha kryeministri në fjalën e tij të rastit.
Sipas tij, emri i Bujar Bukoshit, është përjetësuar me dorën e tij edhe në dokumentin themeltar të shtetit, në Deklaratën e Pavarësisë së Kosovës, të 17 shkurtit të vitit 2008.
“Dr. Bujar Bukoshi, u kujtoftë ndër breza, ashtu siç do të njihet padyshim në historinë e Kosovës”, shtoi tutje Kurti.
Ndryshe, nga ora 10:00 deri në orën 13:00 mbahen homazhe për ish-kryeministrin Bujar Bukoshin në hollin e Kuvendit të Republikës së Kosovës.
Sipas njoftimit të Kryeministrisë, Kurti do të marrë pjesë në ceremoninë e varrimit të ish-kryeministrit të Kosovës, Bujar Bukoshi, në Kompleksin e Dëshmorëve në lagjen Velania në Prishtinë nga ora 14:00. /Telegrafi
