Federata e Futbollit e Kosovës është në fazën e fundit të implementimit të sistemit modern “My FFK”, një platformë gjithëpërfshirëse që digjitalizon të gjitha aspektet e organizimit të futbollit në vend.Ky sistem është pjesë e një projekti të ofruar nga Federata e Futbollit e Arabisë Saudite, e cila jo vetëm që ka mundësuar këtë teknologji të avancuar, por edhe ka dërguar zyrtarët e saj në Kosovë, të cilët po qëndrojnë për të mbështetur trajnimet dhe për të lehtësuar funksionalizimin e plotë të platformës.Aktualisht, në të 7 regjionet e Kosovës, FFK po zhvillon trajnime për të gjitha palët e përfshira: klubet, shkollat e futbollit, zyrtarët e ndeshjeve, referët dhe administratorët.Qëllimi është që secili prej tyre të jetë i përgatitur për përdorimin efikas të sistemit në kohë reale, duke garantuar saktësi, transparencë dhe menaxhim profesional të të dhënave.Ky është një hap i rëndësishëm për dixhitalizimin e futbollit kosovar, pasi edicioni garues 2025/26 do të nisë tërësisht i dixhitalizuar, me të gjitha të dhënat e ndeshjeve të regjistruara drejtpërdrejt nga fushat e futbollit, në kohë reale.Me këtë projekt strategjik, FFK afirmon përkushtimin e saj për modernizim të plotë dhe përafrim me standardet më të avancuara të futbollit global, për dixhitalizimin e tërësishëm të administratës, forcimin e lidhjeve rajonale dhe përfshirjen aktive të të gjithë aktorëve në ekosistemin e futbollit kosovar.
