Ish-sulmuesi i Anglisë, Michael Owen, ka kritikuar reagimet pas fitores së Tre Luanëve ndaj Meksikës, duke thënë se skuadra nuk duhet të konsiderohet “e guximshme” vetëm sepse rezistoi me 10 lojtarë.
“Kam dëgjuar të gjithë duke folur për guximin e Anglisë pas fitores ndaj Meksikës dhe e kuptoj pse. Por ne po ngatërrojmë atë që është guximi i vërtetë në futboll”, deklaroi Owen.
Sipas tij, sakrifica fizike është pjesë normale e detyrës së një futbollisti, ndërsa guximi i vërtetë është të kërkosh topin nën presion, të marrësh përgjegjësi dhe të kontrollosh lojën.
Owen vlerësoi karakterin e ekipit të drejtuar nga Thomas Tuchel, por paralajmëroi se një paraqitje e tillë nuk do të mjaftojë ndaj skuadrave elitare.
“Nëse luajmë kështu kundër Francës, Spanjës apo Argjentinës, do të na shkatërrojnë”, tha ai.
Ish-futbollisti shtoi se Anglia duhet të përmirësojë kontrollin e topit dhe të mos kthehet në zakonet e vjetra:
“Kampionët zakonisht kalojnë një natë ku vuajnë, dhe Anglia e pati atë ndaj Meksikës. Tani sfida është të tregojnë se mund të luajnë futboll, jo vetëm të vuajnë.”
Michael Owen mbetet një nga sulmuesit më të njohur në historinë e futbollit anglez. Me kombëtaren e Anglisë ai zhvilloi 89 ndeshje dhe shënoi 40 gola, duke marrë pjesë në tre Kupa Bote (1998, 2002 dhe 2006).
Ai fitoi famë botërore në Botërorin 1998, ku shënoi një gol të paharrueshëm ndaj Argjentinës, ndërsa në vitin 2001 u shpall fitues i Topit të Artë.
