10 qershor 2025 – Një ndërprerje e pjesshme në platformën ChatGPT ka shkaktuar probleme në aksesimin e shërbimit për mijëra përdorues në mbarë botën. Përdoruesit raportuan vështirësi gjatë hapjes së aplikacionit, ngarkimit të bisedave apo përgjigjeve të paplota nga roboti i inteligjencës artificiale.
Kompania OpenAI, që qëndron pas ChatGPT, konfirmoi ndërprerjen në faqen e saj të statusit, duke bërë të ditur se ekipet teknike po punonin për të zgjidhur problemin sa më parë. Deri në orët e pasdites, pjesa më e madhe e shërbimeve ishin rikthyer në normalitet.
Ndërprerje të tilla teknike nuk janë të rralla për platforma me ngarkesë të lartë, por kjo ndodhi në një kohë kur përdorimi i ChatGPT është në rritje të vazhdueshme në fusha si edukimi, gazetaria, programimi dhe biznesi.
Përdoruesit janë këshilluar të rifreskojnë aplikacionin ose të provojnë më vonë nëse vështirësitë vazhdojnë./Raporto24/
