Komandanti i Forcës së Sigurisë së Kosovës (FSK), Gjenerallejtënant Bashkim Jashari, ka pritur sot në takim Gjeneral Major John Phillips, Drejtor i Komunikimit dhe Kibernetikës në Komandën e Forcave të Shteteve të Bashkuara për Evropë (EUCOM).
Gjatë takimit, Gjeneral Jashari falënderoi Gjeneralin Phillips për bashkëpunimin korrekt dhe profesional ndërmjet FSK-së dhe EUCOM-it, duke theksuar rëndësinë e thellimit të këtij bashkëpunimi në fushën e sigurisë së informacionit dhe komunikimit, sidomos përballë kërcënimeve nga sulmet kibernetike.
Nga ana e tij, Gjeneral Major Phillips përgëzoi Komandantin Jashari për të arriturat e deritanishme në zhvillimin e kapaciteteve të FSK-së.
Në kuadër të këtij takimi, përmes një ceremonie zyrtare, u nënshkrua Marrëveshja e Bashkëpunimit për Ndërveprueshmëri dhe Siguri në Komunikim (CISMOA), mes Komandantit të FSK-së, Gjenerallejtënant Bashkim Jashari, dhe Drejtorit të J6 EUCOM, Gjeneral Major John Phillips.
Kjo marrëveshje ka rëndësi të veçantë, pasi mundëson shkëmbimin e informacioneve të sigurta dhe të kriptuara, si dhe përdorimin e teknologjisë së avancuar të mbrojtjes nga Forca e Sigurisë së Kosovës.
Marrëdhëniet ndërmjet FSK-së dhe aleatëve strategjikë vazhdojnë të jenë thelbësore për fuqizimin dhe zhvillimin e mëtejmë të kapaciteteve mbrojtëse të saj. EUCOM, si një partner kyç, do të vazhdojë të luajë rol të rëndësishëm në këtë proces./Raporto24
