0 prill, 2025 – Ka nisur sot edicioni i parë i Ligës së Shkollave, projekt ky i përbashkët i Komunës së Prishtinës dhe Federatës së Futbollit të Kosovës, i cili po zbatohet nga organizata “Prishtina Tournament”.
Ky projekt gjithëpërfshirës synon jo vetëm zhvillimin e garave mes nxënësve, por edhe promovimin e vlerave thelbësore që futbolli i ofron rinisë – bashkëpunimin, respektin, disiplinën dhe ndershmërinë sportive. Në këtë ligë marrin pjesë 44 shkolla fillore të ulëta dhe 13 shkolla të mesme nga Komuna e Prishtinës.
Liga e Shkollave është projekt në kuadër të strategjisë së FFK-së për masovizimin e futbollit dhe shërben si mundësi e mirë për të identifikuar talentët e rinj, për të ndërtuar ura miqësie ndërmjet shkollave dhe për të përçuar mesazhin se futbolli është mjet i fuqishëm për edukim dhe përbashkim të brezave të rinj.
Ndeshja hapëse e kësaj gare u zhvillua ndërmjet SHFMU “Dardania” dhe SHFMU “Faik Konica” në një atmosferë të jashtëzakonshme të krijuar nga nxënësit e SHFMU “Dardania”, derisa në ditët në vijim do të vazhdojnë përballjet e tjera ndërmjet shkollave pjesëmarrëse.
Të pranishëm në ceremoninë hapëse ishin edhe presidenti i FFK-së, Agim Ademi, si dhe kryetari i Komunës së Prishtinës, Përparim Rama, të cilët përshëndetën këtë nismë të përbashkët për zhvillimin e sportit në shkolla.
