Kryetari i Komunës së Podujevës, Shpejtim Bulliqi, ka njoftuar sot përmes një postimi në Facebook se ka nënshkruar inicimin e procedurave të prokurimit për ndërtimin e tri anekseve shkollore në qytet.
Bëhet fjalë për shkollat fillore dhe të mesme të ulëta “Ibrahim Rugova”, “Enver Maloku” dhe “Xheladin Rekaliu”, të cilat do të përfitojnë nga këto investime në infrastrukturë.
“Këto projekte janë një hap i rëndësishëm drejt realizimit të objektivit tonë për mësim gjithëditor në shkollat e qytetit,” ka shkruar Bulliqi.
Sipas tij, ndërtimi i anekseve do të zgjerojë kapacitetet hapësinore, do të krijojë kushte më të mira për nxënësit dhe mësimdhënësit, dhe do të mundësojë zhvillimin e mësimit kabinetik në përputhje me standardet bashkëkohore të arsimit.
Në njoftim, Bulliqi ka shtuar se në fazën e ardhshme do të përfshihen edhe shkollat nëpër fshatra, me qëllim të përmbushjes së infrastrukturës së nevojshme për zbatimin e mësimit gjithëditor në tërë territorin e komunës së Podujevës./Raporto24/
