Një aksident i rëndë në vendin e punës ka ndodhur sot në komunën e Mamushës, ku një punëtor ka pësuar lëndime të rënda pasi ka rënë nga skela gjatë punimeve për izolimin e një shtëpie, raporton Gazeta Sinjali.
Burime të sigurta bëjnë të ditur se viktima është identifikuar si Albin Gashi, 23-vjeçar, i cili rreth orës 16:45 është rrëzuar nga një lartësi në rrugën “Kultur” në Mamushë.
Në momentin kur patrulla e Policisë ka arritur në vendin e ngjarjes, Gashi ishte i shtrirë në tokë, i gjakosur në fytyrë, por në gjendje të vetëdijshme.
Fillimisht, ai është transportuar me urgjencë në Qendrën Kryesore të Mjekësisë Familjare në Mamushë, pastaj në Spitalin Rajonal të Prizrenit, nga ku për shkak të natyrës së rëndë të lëndimeve është transferuar për trajtim të specializuar në Qendrën Klinike Universitare të Kosovës (QKUK) në Prishtinë.
Në vendin e ngjarjes, përveç njësive të hetuesisë së Stacionit Policor të Mamushës, ka dalë edhe Inspektori i Punës, ndërsa Prokuroria është njoftuar rreth orës 17:50.
Hetimet për zbardhjen e plotë të rrethanave të këtij rasti të rëndë janë duke vazhduar.
