Prishtinë, 4 maj 2025 – Një rast i raportuar fillimisht si rrëmbim ka rezultuar të jetë një inskenim nga vetë viktima, i cili kishte për qëllim përfitimin financiar nga familjarët e tij.
Rreth orës 00:45 të mëngjesit të sotëm, familjarët e një burri rreth 45-vjeçar kanë raportuar në polici se ai ishte rrëmbyer nga persona të panjohur që nga data 30 prill. Sipas tyre, rrëmbyesit kishin kërkuar para përmes mesazheve kërcënuese, në këmbim të mirëqenies së tij.
Pas raportimit, njësitet e hetimeve të Policisë së Kosovës, në bashkëpunim me Prokurorinë, kanë nisur hetime intensive. Rreth orës 13:00, viktima e pretenduar u gjet i vetëm brenda një veture në rrugën “Vëllezërit Fazliu” në Prishtinë.
Gjatë intervistimit, u konstatua se nuk bëhej fjalë për rrëmbim. Në fakt, i dyshuari kishte sajuar gjithë situatën dhe kishte dërguar vetë mesazhet kërcënuese me qëllim të përfitimit financiar nga familja.
Policia e Kosovës, në koordinim me Prokurorinë e Shtetit, po vazhdon me veprimet hetimore për ndriçimin e plotë të rastit dhe ndjekjen ligjore të të dyshuarit për veprim mashtrues dhe shqetësim ndaj familjes dhe institucioneve.
Policia apelon tek qytetarët që të shmangin veprimet mashtruese, të cilat jo vetëm keqpërdorin resurset shtetërore, por shkaktojnë edhe panik të panevojshëm.
