Shqipe Mehmeti Selimi, e lindur dhe e rritur me frymën e atdhedashurisë, u kthye nga Gjermania në Kosovë në vitet e luftës për liri. E vendosur dhe e patrembur, në moshën vetëm 14-vjeçare, ajo mori armët dhe iu bashkua radhëve të Ushtrisë Çlirimtare të Kosovës në Drenicë. Lufta e çeliku shpirtin e saj, duke e bërë pjesë të një brezi që sakrifikoi gjithçka për lirinë e vendit.
Gjatë kësaj periudhe, Shqipja njohu Rexhep Selimin, njërin nga themeluesit e UÇK-së dhe anëtarin e Shtabit të Përgjithshëm. Rexha, i njohur me pseudonimin “Dhjetëshi”, ishte një strateg dhe komandant i guximshëm, i rritur në Drenicë, pranë Adem dhe Hamzë Jasharit. Pas luftës, rrugët e tyre u kryqëzuan sërish dhe pas disa vitesh ata kurorëzuan dashurinë e tyre me martesë.
Pas çlirimit, Rexhep Selimi vazhdoi kontributin e tij në ndërtimin e institucioneve të rendit dhe ligjit në Kosovë, duke mbetur një figurë e rëndësishme politike dhe kombëtare. Në këtë rrugëtim, ai pati pranë gjithmonë Shqipen – një grua të fortë, të zonjën dhe me dinjitet. Sot, ajo mban numrin 10 në listën e Lëvizjes Vetëvendosje, një simbolikë e fortë që e lidh me pseudonimin e bashkëshortit të saj në kohën e luftës.
Shqipe Mehmeti Selimi, nga një vajzë luftëtare, është sot një grua me peshë në politikën kosovare, duke vazhduar të jetë një zë i fortë për idealet e lirisë, drejtësisë dhe dinjitetit kombëtar.
