Entuziazmi për të surprizuar banorin e Big Brother VIP Albania, Gjestin, është kthyer në zhgënjim për katër të rinj shqiptarë të diasporës, të cilët ranë pre e një skeme mashtruese, shkruan Gazeta Sinjali.
Të rinjtë – nga Shqipëria, Kosova dhe Maqedonia e Veriut, por që jetojnë në vende të ndryshme të Evropës – kishin mbledhur mbi 5 mijë euro për të realizuar një surprizë ajrore me dronë dhe parashuta mbi shtëpinë e BBVA-së, por ajo nuk u realizua kurrë.
Sipas emisionit investigativ “Piranjat”, personi që kishte marrë përsipër realizimin e aksionit ishte Diamant Aliu, 32-vjeçar nga Ferizaj, i cili pas marrjes së shumës është zhdukur pa lënë gjurmë.
Gazetarët e emisionit udhëtuan drejt Ferizajt për të kontaktuar me Aliun, por ai refuzoi të përgjigjet.
Fillimisht, u tentua komunikimi me ish-bashkëshorten e tij, e cila deklaroi se nuk kishte më asnjë lidhje me të, si dhe me disa nga familjarët e tij – pa sukses.
Përballja e vetme ndodhi në derën e shtëpisë së tij, ku Aliu u përball me ekipin e gazetarëve, por e mbylli derën pa dhënë asnjë shpjegim për paratë e zhdukura.
Rasti ka ngjallur reagime të shumta në rrjetet sociale, por ende nuk dihet nëse djemtë e diasporës do ta ndjekin rastin në rrugë ligjore për përvetësimin e shumës që u mblodh në mirëbesim.
