Mbrojtja e ish-presidentit Hashim Thaçi ka kërkuar që të mos zhvillohen dy gjykime paralele dhe që rasti për veprën penale kundër administrimit të drejtësisë të veçohet. Argumenti i parë që ka përdorur mbrojtja është mungesa e financimit. E në Zyrën e Prokurorit të Specializuar e kanë kundërshtuar propozimin, duke thënë se Thaçi nuk i ka shfrytëzuar krejt mundësitë për financim
Ish-presidenti Hashim Thaçi, i cili është i akuzuari i vetëm i Dhomave të Specializuara të Kosovës në Hagë për dy çështje penale, ka kërkuar që t’i veçohet procedura për rastin që ka të bëjë me “ndikimin te dëshmitarët”.
Në mbrojtjen e Thaçit kanë argumentuar se angazhimi në rastin më të madh të Speciales, i cili ka të bëjë me krime të luftës dhe krime kundër njerëzimit, do ta mbingarkonte të akuzuarin dhe se nuk do t’ia lejonte atij pjesëmarrjen në mënyrë efektive në përgatitjen e mbrojtjes për çështjen tjetër.
Avokatja e tij, Sophie Menegon, ka argumentuar se Thaçi nuk ka para për t’i paguar dy ekipe njëherësh.
“Formimi i një ekipi të dytë, tërësisht të ndarë, do të kërkonte resurse të konsiderueshme shtesë, që z. Thaçi nuk i ka. Menaxhimi i mbulimit të kostove për ndihmën ligjore nuk nënkupton edhe aftësinë për t’i paguar dy ekipe njëkohësisht. Rregullat e DHSK-së për ndihmë ligjore nuk ofrojnë zgjidhje të problemit, meqë z. Thaçi nuk është i varfër siç parashihet me legjislacion. Sidoqoftë, z. Thaçi ka ndarë tashmë mjetet që i ka në dispozicion nga rasti 06. Këto shpenzime nuk mund të reduktohen, veçanërisht gjatë kësaj pike kritike në rastin 06”, thuhet në parashtrimin e mbrojtjes së Thaçit.
Mbi Thaçin rëndojnë dy akuza, për krime lufte dhe për pengim të administrimit të drejtësisë.
Në Zyrën e Prokurorit të Specializuar (ZPS) i kanë thënë gjykatës se nuk qëndrojnë argumentet e mbrojtjes se gjykimi në të njëjtën kohë për dy raste është i paprecedentë dhe se mbrojtja nuk i ka shterur të gjitha mundësitë për financim.
“Si alternativë, tërheqja e një mbrojtësi të specializuar nga rasti 06 për t’u fokusuar vetëm në rastin 12, është rrugë e mundshme. Tjetra, nëse Thaçi nuk ka fonde për një ekip të dytë ligjor, që thuhet se është përtej mjeteve të tij private, rrugë e përshtatshme është t’i qaset administratores me kërkesë për ndihmë ligjore. Rregullat e DHSK-së për ndihmën ligjore i lehtësojnë kërkesat e personave të cilët mund të jenë të varfër ose pjesërisht të varfër. Opsione të arsyeshme dhe pragmatike duhet të preferohen para ndarjes së panevojshme të aktakuzës”, është theksuar në parashtrimin e ZPS-së.
Në Fondacionin “Përkrahje për mbrojtjen juridike të Hashim Thaçit” u patën ankuar në fillim të vitit 2024 për mungesë të mbështetjes nga Qeveria e Kosovës, një ditë që pasi avokati, Gregory Kehoe, ka vendosur që të tërhiqej nga mbrojtja e Thaçit.
Ky fondacion, për herë të fundit ka kërkuar ndihmën e qytetarëve me një postim në Facebook, në nëntor të 2024-tës, në të cilën bëhej e ditur edhe mundësia që përkrahja të jepej në një llogari të hapur në Shqipëri.
