Policia e Rajonit të Prishtinës, përkatësisht njësiti rajonal i trafikut rrugor me motoçikleta, ka intensifikuar aktivitetet në rrugët nacionale dhe rajonale të këtij rajoni.
Ky angazhim ka për qëllim identifikimin dhe ndëshkimin e kundërvajtjeve në komunikacion, si dhe parandalimin e aksidenteve, veçanërisht në zonat e cilësuara më herët si me rrezikshmëri të lartë.
Gjatë tri ditëve të para të operimit, janë shqiptuar mbi 45 fletëparaqitje për kundërvajtje të ndryshme, janë konfiskuar 13 skuterë të paregjistruar, ndërsa janë dhënë edhe gjoba për shkelje të tjera si përdorimi i telefonit gjatë ngasjes dhe mosrespektimi i semaforëve.
Policia e Kosovës rithekson përkushtimin e saj për rritjen e sigurisë rrugore dhe përforcimin e prezencës në terren, sidomos gjatë sezonit veror kur qarkullimi në rrugë është më i dendur.
