Katër serbë u arrestuan të shtunën në Gjakovë, për të cilët Qeveria njoftoi se një prej tyre ishte toger i policisë së Serbisë dhe tjetri kapiten i ushtrisë së këtij vendi.
Të arrestuarit nuk janë pelegrinë, siç u raportua në media. Paparaci përmes burimeve të veta mëson se të njëjtit dyshohet se janë infiltruar si të tillë.
Paparaci ka siguruar edhe identitetet e tyre. Bëhet fjalë për Branko Rakic me vendbanim në Mitrovicë, Nemanja Vamokic me vendbanim në Novi Sad, Pavle Kragovic ne vendbanim në Beograd dhe Milovan Stevic me vendbanim në Mitrovicë.
Këshilli i Sigurisë i Kosovës mbajti sot një mbledhje, e kërkuar nga kryeministri në detyrë Albin Kurti.
Sipas njoftimit për media, mbledhja u thirr për shkak të ndërhyrjeve kriminale nga ana e Serbisë.
Sipas njoftimit për media kërkesa për këtë mbledhje erdhi si rezultat i ndërhyrjeve kriminale nga ana e Serbisë.
Shtojmë edhe arrestimin e mbrëmshëm të katër ‘pelegrinëve’ serbë në Gjakovë – nga të cilët njëri ishte toger i policisë së Serbisë e tjetri kapiten i ushtrisë së Serbisë, dhe krejt çfarë u është konfiskuar atyre”, thuhet mes tjerash, derisa nga ky takim tashmë kërkohet që të gjitha institucionet dhe mekanizmat e shtetit ta mbajnë lart vëmendjen dhe gatishmërinë.
Në raportin 24-orësh të Policisë së Kosovës, është njoftuar për arrestimin e katër personave në Gjakovë.
Gjatë kontrollit të një veture me targa serbe, policia gjeti dhe sekuestroi dy thika dhe një sëpatë. Rasti u klasifikua si armëmbajtje pa leje.
“Rr. Gasper Karaqi, Gjakovë / 05.04.2025 – 18:30. Katër të dyshuar meshkuj janë arrestuar për shkak se gjatë kontrollit në bagazhin e veturës së tyre me targa të Serbisë janë gjetur dhe sekuestruar dy thika dhe një sëpatë. Të dyshuarit në konsultim me prokurorin janë dërguar në mbajtje’’.
Në këtë mbledhje, anëtarët e Këshillit të Sigurisë të Kosovës theksuan se ndërhyrjet e Serbisë janë shtuar se po tentohet të shkaktohen tensione etnike dhe ndërpartiake në Kosovë, me qëllim destabilizimin e vendit.
