Presidenti i Ukrainës, Volodymyr Zelenskyy, ka deklaruar se Rusia po përfshihet në “një tjetër mashtrim” duke mos dorëzuar asnjë propozim konkret për zgjidhjen e paqes, përpara një takimi të mundshëm mes Moskës dhe Kievit
Në një fjalim të mbajtur në video-live, Zelenskyy tha se edhe “memorandumi” i premtuar nga Moska ende nuk është parë nga askush, përfshirë edhe Turqinë, e cila priti raundin e parë të bisedimeve.
Nga ana tjetër, ministri i Jashtëm rus, Sergei Lavrov, ka thënë se Rusia ka përgatitur një memorandum që përshkruan pozicionin e saj dhe ka propozuar një raund të dytë negociatash në Stamboll, të hënën. Përbërja e delegacionit rus do të mbetet e njëjtë si në raundin e parë, konfirmoi zëdhënësja e ministrisë së Jashtme, Maria Zakharova
Megjithatë, Zelenskyy e ka kritikuar qasjen e Rusisë, duke thënë se Moska po përpiqet ta sabotojë procesin e paqes për të fituar terren në frontin e luftës, ndërsa bën manovra për të mbajtur SHBA-në në pozicion neutral. Ai kërkoi që aleatët ndërkombëtarë të shtojnë presionin ndaj Kremlinit.
Zëdhënësi i Kremlinit, Dmitry Peskov, deklaroi se ende nuk ka një përgjigje zyrtare nga Ukraina për pjesëmarrjen në takimin e propozuar, ndërsa Zelenskyy e akuzoi Moskën për “zhargon diplomatik bosh” dhe përpjekje për të zvarritur bisedimet.
