Një person është qëlluar me armë zjarri pasditen e së mërkurës ku për pasojë ka humbur jetën, ndërsa lidhur me këtë rast janë arrestuar dy persona (babë e bir)
Në raportin 24 orësh të Policisë së Kosovës bëhet e ditur se rasti ka ndodhur mërkurën rreth orës 13:45 në Skenderaj.
Tutje në raport thuhet se janë sekuestruar disa armë.
“Një mashkull kosovar, është qëlluar me armë zjarri dhe si pasoj e kësaj ka humbur jetën. Vdekjen e viktimës e ka konstatuar ekipi mjekësor në vendin e ngjarjes. Lidhur me rastin janë arrestuar dy të dyshuar meshkuj kosovarë (babë e bir) dhe nga të njëjtit janë sekuestruar: një armë AK47, tri armë të shkurta (pistoleta) dhe 53 fishekë kalibrash të ndryshëm”, thuhet në raport.
Siç thuhet në raport me vendim të prokurorit trupi i pajetë është dërguar në IML për obduksion, ndërsa të dyshuarit janë dërguar në mbajtje.
Ndërkaq, nga Prokuroria Themelore e Mitrovicës bën të ditur se janë identifikuar dy personat e dyshuar për këtë rast dhe fillimisht të dyshuarit ishin në arrati.
“Prokurori i rastit nga Departamenti i Krimeve të Rënda ka dalë menjëherë në vend ngjarje ku është konstatuar se një person ka mbetur i vrarë. Rasti është cilësuar si ‘vrasje e rëndë’ dhe dy persona të dyshuar janë identifikuar…”, ka thënë zëdhënësi i Prokurorisë Themelore të Mitrovicës, Valon Preteni. /Telegrafi/
