Ylli i Inter Miami dhe legjenda e Barcelonës, Lionel Messi, ka folur për mundësinë e pjesëmarrjes në Kupën e Botës 2026 dhe për momentin kur mund të tërhiqet nga futbolli.
38-vjeçari, i cili ka nënshkruar një rinovim kontrate me klubin amerikan deri në vitin 2028, ka komentuar gjithashtu mundësinë e rikthimit në Barcelonë për të jetuar aty me familjen e tij.
Megjithëse Messi ka thënë se ende ka dëshirë të fitojë, ai pranoi se kërkesat dhe presioni në Major League Soccer janë më të ulëta se ato në Evropë. Përsa i përket pensionimit, ai tha:
“Jam i lumtur me mënyrën si kanë kaluar këto vite, dhe për sa kohë që mundem dhe ndihem mirë fizikisht, do të vazhdoj të luaj në të njëjtën mënyrë — duke u përpjekur të konkurroj, të fitoj dhe të jap gjithmonë maksimumin. Në momentin që do të ndiej se nuk jam më në gjendje fizike, se po vuaj në fushë ose që nuk po e shijoj më, atëherë do të jetë momenti për ta lënë. Por tani për tani, po e shijoj, ndihem mirë, dhe aty jam.”
Në lidhje me Botërorin 2026, Messi tha se nuk është i sigurt nëse do të marrë pjesë, pavarësisht se ai e ka quajtur këtë mundësi shumë speciale. Ai theksoi:
Po, sigurisht që është një Botëror i veçantë. Është gjithmonë diçka e veçantë të luash me kombëtaren, të jesh pjesë e kompeticioneve të rëndësishme, sidomos pasi e kemi fituar atë. Por, siç e kam thënë, nuk dua të jem një barrë për ekipin. Dua të ndihem mirë fizikisht, të jem i sigurt se mund të ndihmoj dhe të kontribuoj për grupin.”
Messi e mori me qetësi këtë periudhë përgatitore dhe tha se do të shohë si do të ndihet afër datave të Botërorit:
“Sezoni ynë është ndryshe nga ai europian. Do të kemi një periudhë përgatitore ndërmjetëse, pak ndeshje përpara Botërorit, dhe do të shohim ditë pas dite nëse ndihem mjaftueshëm në formë për të qenë aty ku dua dhe për të marrë pjesë. Po e marr me qetësi, ditë pas dite.”
Messi do t’i bashkohet kombëtares së Argjentinës në Alicante pas vizitës së shkurtër në Barcelonë. Megjithatë, ai ka munguar në katër nga shtatë ndeshjet e fundit të Argjentinës këtë vit, ndërsa me Inter Miamin ka shënuar 42 gola dhe ka dhënë 20 asistime në 46 ndeshje këtë sezon.
